Nosse lingadje

C’è-st-on foû bia lingadje qu’on cause après nos-ôtes
Qui nos conte sès racènes au d’ truviè d’ sès patwès.
I cause come one tchanson èt sint bon come one vôte,
I d’chind dins vosse gosî come on vêre di pèkèt.

Do fond dèl Picardîye jusqu’au coron dès Fagnes
È tot choûtant causer lès djins d’ nosse Walonîye
Vos crwêrîz qu’on bon vint s’a pris dins l’ bwès d’ Marlagne
Èt qu’il ènn’a rèchu one tote bèle mèlodîye.

Èt dins ç’ bia lingadje-là qu’a l’ coleûr di l’Ârdène
Wèyoz nos Blancs Moussîs ou nos spitants Chacheûs  ;
Gostoz nos miscoterîyes, nos-orèyes di bèguènes
Oyoz nos p’tits mouchons, choûtoz l’ crotchèt-vîdjeû.

Chaque patwès sès ritchèsses po çu qu’i-gn-a à dîre,
Gn-a saquants difèrinces di Lîdje à Châlèrwè,
Mins faut yèsse pêrcé fwârts po conèche lès frontîres
N’s-èstans tot l’ minme tortos, dès-èfants da Tchantchès.

On lingadje plin d’imaudjes, po nos bin fé comprinde
C’èst l’ maniére da nos-ôtes di dîre à môde di djins.
Nos-avans on lingadje qui mèrite qu’on l’ disfinde
Avou tos sès r’vazîs po l’ flori simplumint.

C’è-st-on tot p’tit lingadje qu’a passé l’Atlantique
Po qu’ nos tayons cinsîs î vayenuche fé leû nid
Èt waurder bin vikants lès mots èt leû musique
En s’ rachonant al chîje tot causant d’ nosse payis.

C’è-st-on paurladje qui mûwe come on tauvia d’ârtisse
Èt maugré tot faît rîre èt sint voltî vos pîds
Vos-aprind nos-ûsances, qui cause avou franchise
Mins tchante come one faubite quand on l’ maîstri voltî.

C’èst dîre qu’ c’è-st-à maulvau si on l’ riwaîte di crèsse
C’è-st-on foû grand lingadje qu’on-z-a traîtî di p’tit
Portant quand on l’ conèt, c’è-st-one fameûse ritchèsse.
C’è-st-on grand lîve d’istwêre, d’ûsances di nosse payis.

Èt dès corons d’ Mâmedi tot d’chindant j’qu’à Djodogne
On dîreûve qui lès mots d’ nosse pitite Walonîye
Tot passant pa Nameur, Châlèrwè ou Bastogne,
Âront faît su pont d’ timps one tote grande sinfonîye.

Èt dès corons d’ Mâmedi tot d’chindant j’qu’à Djodogne
On dîreûve qui lès mots d’ nosse pitite Walonîye
Tot passant pa Nameur, Châlèrwè ou Bastogne,
Âront faît su pont d’ timps one tote grande sinfonîye.

La langue de chez nous d’Yves Duteil)